Top 3 Brgy sa Santo Tomas nga daghang nabakunahan nakadawat og cash incentives

Tulo ka barangay sa Santo Tomas, Davao del Norte ang nakadawat og cash incentives human nakatala og taas nga ihap sa mga nabakunahan kontra COVID-19.

“Naghatag kita og cash incentives isip paghatag og recognition sa atong mga barangay officials ug mga residente tungod sa ilang participasyon sa resbakuna campaign sa atong gobyerno,” sulti ni Santo Tomas Mayor Ernesto Evangelista.

Una sa listahan mao ang Barangay New Visayas nga adunay 68.26 percent ihap sa mga residente sa barangay nga nabakunahan, nisunod ang Barangay Salvacion nga dunay 65.70 percent, ug Barangay Pantaron nga dunay 61.38 percent.

Kini subay sa taho gikan sa Municipal Health Office (MHO) base sa datos niadtong Disyembre 31, 2021.

Ang Barangay New Visayas makadawat og P50,000 cash, Barangay Salvacion P30, 000 ug P20, 000 cash sa Barangay Pantaron.

Sumala kang Evangelista ang nasangpit nga cash incentive kabahin sa estratehiya sa iyang administrasyon aron mapataas ang rate sa pagbakuna.

“Ang Kapitan na ang bahala kung unsaon nila na ang kwarta na ilang nadaugan. Basta kita sa Santo Tomas LGU maningkamot lang na mangita og pamaagi na makab-ot nato ang herd immunity para kita mismo kusog atong depensa batok sa COVID- 19,” dugang sulti ni Evangelista.

Samtang, si Municipal Administrator Atty. Si Elisa Evangelista nagkanayon nga ang main vaccination site sa LGU magpabilin nga operational dugang pa sa mga team nga nagpahigayon og vaccination activities nga naga-catering sa mga barangay isip satellite inoculation sites.

Dugang pa ni Evangelista, nangandam na sila sa pagpadayon sa vaccination program samtang ang kagamhanan sa lungsod nagpaabot sa kamanduan gikan sa Department of Health (DOH) alang sa paghatag og booster shots alang sa mga kwalipikadong populasyon.

Gibutyag usab niya nga ang LGU naghunahuna sa ubang mga insentibo sama sa pagluag sa mga restriksyon, ug dugang nga paglihok alang sa hingpit nga nabakunahan nga mga indibidwal.