SSS members gi-awhag nga mo-apply na sa Loan Condonation Program

Gi-awhag karon sa Social Security System (SSS) ang mga myembro dinhi sa Davao region nga mo-apply na sa Short-Term Member Loan Penalty Condonation Program (STMLPCP) pinaagi sa online sanglit molungtad pa kini hangtud sa February 14, 2022.

Atol sa programa sa radio, gibutyag ni SSS Davao Regional Information Officer Greta Fe Quayle nga ang STMLPCP kabahin sa Pandemic Relief ug Restructuring Programs nga gitanyag sa SSS.

“Padayon natong gitubag ang problema sa mga myembro ilabi na nga wala kabayad sa ilang loan tungod sa epekto sa pandemya,” matud pa ni Quayle.

Pinaagi sa gitanyag nga loan condonation sa SSS mawagtang na ang mga natigum nga multa ug  bugtong loan principal ug interest na lang ang paga bayran .

Apil sa programa ang mga dunay outstanding Salary, Calamity, Salary Loan Early Renewal Program (SLERP), Emergency Loans and Restructured Loan ubos sa Loan Restructuring Program (LRP) niadtong 2016 hangtud 2019.

Ang mga kwalipikadong mo-apply mao kadtong mga myembro nga dunay short term member loans diin past due na og unom ka bulan hangtud sa pag-apply niini sa condonation program. 

Mga myembro kinsa wala pa nahatagan og hingpit nga benipisyo sama sa permanent total disability ug retirement ug kadtong mga myembro kinsa wala na-disqualified tungod sa  pagpanikas ug pangilad batok SSS.

Subay niini gi-awhag ang mga member-borrowers nga moadto sa mga duol nga branch sa SSS sa inyong lugar kung dunay ipaklaro ilabi na sa computation sa pagbayad sa loan condonation. (NW)