Road construction sa kompanya sa mina buot ipahunong sa konseho sa Pantukan

Mipagawas og resolusyon ang mga miembro sa konseho sa lungsod sa Pantukan, Davao de Oro niadtong Disyembre 1, 2021 aron temporaryong ipahunong ang ginapahigayong road construction sa Arch Nickel Corporation/Riverbend.

Ang Arch Nickel Corporation/Riverbend usa ka kompanya sa mina nga nakabase sa Barangay Pintatagan, Banaybanay, Davao Oriental.

Sa Resolution No. 144-A, Series of 2021, ang Sangguniang Bayan sa Pantukan, nga gipangulohan ni Vice Mayor Madel Malone-Cervantes, mihangyo sa buhatan sa Mines and Geosciences Bureau (MGB) sa Region XI, sa pagpahunong sa maong road construction.

Ang road construction, matud pa, maoy mohatag og access sa maong korporasyon sa mina padulong sa ilang mining areas sa Pantukan ug Banaybanay.

Apan matud pa sa konseho, nga basi sa gihimong hearing sa Committee on Natural Resources and Environmental Protection niadtong Nobyembre 5, 2021, nakita ang dakung kadaut nga gidala sa maong minahan ngadto sa katubigan ug kasubaan sa Barangay P. Fuentes Sr. sa Pantukan.

Ang maong operasyon sa Arch Nickel Corporation/Riverbend midala og dakung polusyon sa tinubdan sa tubig sa Kalahi 1 ug Kalahi 2 water system sa Barangay P. Fuentes Sr.

Napamatud an sa gipahigayong committee hearing niadtong Nobyembre 5 nga ang tinubdan sa tubig sa duha ka Kalahi water systems nasagulan na sa lapok tungod sa padayong operasyon sa maong minahan.

Ang katawhan mismo sa Barangay P. Fuentes Sr. maoy mipamatuod nga dili na nila mapuslan ang tubig nga naggikan sa duha ka water systems.

Ang water systems maoy gisaligan sa katawhan sa maong barangay ug mga silingang dapit aron ilang magamit sa ilang panimalay, apan sa kasamtangan, dili na nila mapahimuslan tungod sa lapok ug mga hugaw.

Ang konseho sa Pantukan, pinaagi sa nasangpit nga resolusyon, nagtuo nga ang hinungdan sa pagkadaut sa tubig sa P. Fuentes Sr. mao ang ginapahigayong road construction sa Arch Nickel Corporation.

“Whereas, we believe that the pollution of their drinking water is caused by the construction of Arch Nickel roads since the operation involves rehabilitation of the area,” matud pa sa konseho sa Pantukan.

Gidugang pa sa konseho nga ang mga opisyal sa P. Fuentes Sr., niadtong Oktubre 10, 2021, mipasaka usab og usa ka resolusyon alang sa pagpahunong sa operation sa Arch Nickel Corporation tungod sa kadaut nga gidala ngadto sa kasubaan sa maong barangay.

Ang maong resolusyon nahidangat na sa konseho sa Pantukan og maoy nahimong basehan sa gipahigayon niini nga committee hearing niadtong Nobyembre 5.

Ang konseho sa Pantukan hugot nga nagahangyo sa buhatan sa MGB-XI nga himoan na og konkretong lakang ang problema sa katawhan sa P. Fuentes Sr. nga gidala sa Arch Nickel Corporation.

Hangtud ning higayona, wala pay tataw nga aksyon ang MGB-XI kabahin sa hangyo sa konseho sa Pantukan, ingon man sa mga yangongo sa katawhan sa P. Fuentes Sr.