Piñol nagdonar og semilya sa giant bamboo ug langka sa Police training camp

Gipangunahan ni kanhi Agriculture ug Mindanao Development Authority (MinDA) Secretary Emmanuel Piñol ang ceremonial planting sa iyang gidonar nga 1,000 Giant Bamboo planting materials ug 100 Abuyog Jackfruit niadtong Disyembre 30, 2021.

Sumala ni Police Regional Office 11 (PRO-11) regional director Brig. Gen. Filmore Escobal laraw niining itanom ang mga nadawat nga seedling palibot sa 100 ektaryang luna sa police training center.

Tumong sa Philippine National Police (PNP) Mindanao Training Center nga nahimutang sa Sitio Lutangan, Barangay Kapatagan nga himoon kining usa ka “Green Camp” diin tanuman kini og mga nagkalain-laing species sa mga indigenous tree. 

“I suggest nga kining training facility mahimong “Green Police Camp” nga magsilbi nga modelo sa komunidad diri sa Kapatagan for sustainable agroforestry diri sa mga tag-as nga lugar. It would turn into an oasis and an agro-forestry area in Kapatagan,” tipik sa mensahe ni Piñol atol sa iyang pakighinabi sa media.

Misaad usab si Piñol kinsa modagan pagka senador sa 2022 election  nga modonar pa og dugang 4,000 ka giant bamboos ug dugang 900 jackfruit seedlings. 

“I have launched on my own the Green Philippines advocacy wherein I will distribute around 1,000 bamboo seedlings in every province of the country,” dugang sulti ni Piñol.

Sa iyang bahin, mapasalamaton si Police Regional Office 11 (PRO-11) regional director Brig. Gen. Filmore Escobal, ngadto kang Piñol ug sa MinDA sa paghatag sa maong mga seedling isip unang lakang aron mahimong usa ka potential agroforestry ang maong lugar. 

“Naglisud mi sa pagpangita og mga seedlings, dunay may gihatag apan limitied lamang. Maglisud mi sa pagkab-ot sa among tumong mga nahimong re-greening o reforesting ang kampo,” sulti ni Escobal. 

Dugang pa ni Escobal nga ang maong mga kawayan mahimong protected barrier sa pasilidad sa kampo gumikan ang maong dapit sagad nga ginabisita og kusog nga hangin.

“Parte kini sa among proyekto mao ang Police Makakalikasan, usa ka national project sa PNP,” dugang sulti niya.