Piñol giawhag ang minilyon ka myembro sa Eagles nga mag tree planting

Nanawag karon si kanhi Agriculture Secretary ug senatorial aspirant Emmanuel Piñol ngadto sa minilyon ka sakop sa  Fraternal Order of the Eagles nga mananom og punoan aron panalipdan ang Philippine Eagle. 

Ang maong organisasyon adunay unom ka milyon ka miyembro nga dunay katakos nga mopahigayon og tree planting.

Kini human sa pagbisita ni Piño sa General Santos City di pa lang dugay kinsa nagkanayo nga ang maong grupo dako ang mahimong kontribusyon aron mapanalipdan ang nahibiling puluy-anan sa nasudnong langgam nga Agila.

“Akong gihangyo ang National President sa Regional Governors, Eagle Larry Franco nga isumite sa nasudnong pamunoan sa fraternity ang akong sugyot alang sa Philippine Eagles nga suportahan ang akong Green Philippines Advocacy,” matod pa ni Piñol.

Gisugyot ni Piñol ang lima ka tuig nga programa nga pangunahan sa Fraternal Order of the Eagles diin ang matag usa sa unom ka milyon nga miyembro obligado nga mananom og 100 ka kawayan, prutas, o native trees matag tuig.

Dugang pagpasabot ni Piñol nga 600 milyones ka kawayan ug kahoy ang matanom ug maatiman matag tuig diin sulod sa lima ka tuig mukabat na kini ug tulo ka bilyon.

Gibutyag usab niya nga ang National President of the League of Governors misaad nga gilayong iduso ang iyang sugyot ngadto sa nasudnong pamunoan.

Kasayran nga “Philippine-born fraternal order” miuswag sa mga katuigan uban sa mga miyembro niini nga mikabat na karon og unom ka milyon nga gipangunahan sa propesyonal, public servants ug mga lider sa komunidad.

Atol sa iyang pakigpulong, nipahimangno si Piñol sa mga sakop ug mga opisyal nga gawas kon dinalian ug hiniusang paningkamot gilayon nga himoon ang nahibiling 6 porsiyento sa nasudnong kalasangan sa nasod, ang pinuy-anan sa Philippine Eagle, mahimong mawala sa mosunod nga mga tuig.

“Dili lamang kini mosangpot sa pagkawala sa Philippine Eagle apan makahulga usab sa seguridad sa pagkaon sa nasud,” dugang niya.

Uban sa iyang Green Philippines Advocacy, si Piñol misaad nga mohatag og mga giant bamboo seedlings sa nagkalain-laing probinsya sa nasud alang sa re-greening ug reforestation.

Sumala niya nga ang pagpatubo sa higanteng kawayan sayon ug ekonomikanhon tungod kay wala kini magkinahanglan og mga abono ug kini adunay taas nga regenerative nga kinaiya diin aduna kini daghang mga saha nga padayon nga nagtubo aron ilisan ang mga  naharvest na.

Gawas sa kawayan, libre sab nga gipang- apud-apod ni Piñol isip kabahin sa iyang Green Philippines Advocacy ug nanawagan sa pagtanom og mga kawayan, fruit trees, ug endemic tree species sa mga deforested nga dapit sa nasud.