Park and Baywalk sa Mati City ablihan na sa publiko

Human sa kapin usa ka tuig nga pagsarado, ablihan na og balik ngadto sa publiko ang Mayor Francisco G. Rabat Park and Baywalk karong Biyernes, Nobyembre 5, sa alas kwatro sa hapon.

Gipasirad-an ang maong parke Marso 2020 human magpatuman og lockdown ang dakbayan tungod sa COVID 19 pandemic.

Ang pag-abli sa maong parke subay sa Alert Level 2 nga klasipikasyon sa Dakbayan sa Mati base sa Alert Level System sa nasyonal na panggamhanan.

Sayo niini, nagpaguwa usab ug Orden de Ehekutibo si Mayor Michelle Nakpil Rabat nga nagtugot sa batang edad singko anyos pataas nga mugawas sa balay og muadto sa mga lugar sama sa parke ug resorts.

Mismong si Mayor Michelle Nakpil Rabat ang mutambong sa subling pag-abli sa parke.

Sulod sa baynte ka bulang pagsarado, gipaayo ug gipanindot sa administrasyon ni Mayor Michelle ang parke nga gigahinan og P35 million pesos nga budget gikan sa nasyonal ug lokal nga panggamhanan.

Ang bag-ong Mayor Francisco G. Rabat Park and Baywalk duna nay amphitheater, children’s playground, food stalls ug uban pang pasilidad aron sa mas nindot ug luwas nga pagsuroy-suroy sa katawhan.

Tungod sa nagpadayong hulga sa Covid-19, hugot usab ang pagpatuman sa City Ordinance 427 kon ang Disiplina Panahon sa Pandemya Ordinance.

Kinahanglan usab nga bakunado ang mga hamtong nga dunay kaubang bata na musulod sa parke.

Ang mga senior citizens edad 65 pataas, kinahanglan usab nga bakunado.

Sa pinakaulahing guidelines nga gipaguwa sa Mati Incident Management Team niadtong Nobyembre 4, ablihan ang children’s playground gikan alas tres sa hapon hangtud alas nuybe sa gabii.

Kinahanglang dunay kauban nga hamtong ang mga bata nga fully vaccinated.

No vaccination card, no entry ang polisiyang ipahamtang sa children’s playground.

Singkwenta lamang ka bata ang pasudlon sulod sa playground ug mamahimo lamang silang magdula sulod sa duha ka oras.

Human sa duha ka oras, pulihan na pud sila og laing batch sa mga bata. Dunay designation area alang sa mga ginikanan na kauban sa mga bata.

Bawal magkaon sulod sa playground ug kinahanglang gihapon mag-obserba sa minimum health standards.

Samtang ang ubang parte sa baywalk park ablihan gikan alas singko hangtud alas otso sa buntag alang sa mga mag-ehersisyo.

Abli usab kini gikan alas tres sa hapon hangtud alas nuybe sa gabii. Ang entrance sa baywalk park didto duol sa baywalk stage.

Kinahanglan usab magpakita og vaccination card ang mga musulod sa parke.

Sa mga wala pa mabakunahi, mamahimo gihapon silang pasudlon apan hangyuon silang magpabakuna sa bakuna site nga nahimutang likod sa baywalk stage.

No face mask, no entry policy ang polisiyang ipahamtang sa baywalk park. Bawal usab magdala ug pagkaon sulod sa parke. 

Ang mga personahe sa Civil Security Unit, Philippine National Police, City Traffic management Office, Philippine Coast Guard, Bureau of Fire Protection, City Disaster Risk Reduction and Management Office, ug City Health Office magtambayayong aron masigurong luwas ug hapsay ang subling pag-abli sa Mayor Francisco G. Rabat Park and Baywalk. (PR)