Pagpatuman og restriksyon sa dili bakunado supak si Mayor Sara

Dili uyon si Mayor Sara Duterte nga ipatuman sa siyudad ang restriksyon kon paglimita sa lihuk sa mga dili bakunado batok COVID-19 sama na lang ang pagsulod sa  publilkong gambalay ug pagkuhag serbisyo gikan sa gobyerno.

Hinuon gitugyan ni Mayor Sara ang pagbuot o pagdesisyon sa mga tag-iya og negosyo labot pagtakda og mga patakaran sa pagsulod sa mga tawo nga wala pa mabakunahan sa ilang mga establisemento.

Atol sa programa sa radyo niadtong lunes, gipadayag ni Mayor Sara nga ang city government dili mopatuman og  entry restrictions sa mga wala pa nabakunahan.

“I am pro vaccination gyud, and boosters. Pero in this case, dili gyud ko maka-agree with the exclusion or restriction with the unvaccinated. Tungod kay they were given the freedom to choose. Kung wala to sila gitagaan sa freedom nga mopili nga dili magpabakuna, then pwede ra gyud nato na sila ikulong diha sa ilang balay. But gitagaan man nato sila og freedom, so ngano sila palisdan pud,” pagpasabot sa Mayor.

 Giklaro sab nga nagpabiling boluntaryo ug dili mandatory ang pagbakuna.

“Para sa akoa as city mayor, the government did not make it mandatory ang vaccination nato tanan. Therefore, people we’re given a choice: kung magpabakuna sila or dili. Karon, katong nagpili nga dili sila magpabakuna, they should not be discriminated. Kay gitagaan man sila’g choice ,” dugang paklaro ni Mayor Sara .

Una niini, mitumaw ang isyung pagpatuman og restrictions sa mga taong dili  bakunado sa dakbayan human nga ang Metro Manila nagsugod na sa pagpatuman og restrictions tungod sa padayong  pagtaas sa kaso sa COVID-19.