Paggamit og barrier sa mga motorsiklo, PUJ ug PUV giwagtang na sa Davao City

DAVAO CITY – Giwagtang na sa Davao City ang mandatory nga paggamit sa mga babag o barrier sa mga motorsiklo, PUJs ug PUVs epektibo Nobyembre 2 ning tuiga.

Subay sa gipagulang Executive Order No. 63 Series of 2021 sa City Government sa Davao nakalatid nga epektibo Nobyembre 2 dili na kinahanglan ang paggamit sa motorcycle barriers ug pagbutang og plastic barriers sa mga jeepney ug ubang public utility vehicles aron mabulag ang mga pasahero isip pagsunod sa social distancing  apan bisan paman niiini, gidasig gihapon ang mga katawhan sa paggamit niini isip safety measures.

Kahinumdoman nga ang Davao City gipaubos sa Inter-Agency Task Force for the Management of Emerging Infectious Diseases (IATF-EID) ubos sa Alert Level 3 sugod niadtong Nobyembre 1.

Tungod niini, giluagan na sa siyudad ang pipila ka mga restriksyon nunot sa nakitang kalamboan sa sitwasyon sa COVID-19 sa syudad.

Gianunsyo sa Department of Transportation (DOTr) niadtong Oktubre 31 nga dili na kinahanglan ang mga plastic barrier alang sa pagbulag sa mga pasahero sulod sa mga public utility vehicles (PUVs).

“Adunay panginahanglan sa pagpagaan ug pagtangtang sa mga restriksyon human sa gitahong pagkunhod sa gidaghanon sa mga kaso ug ang aktibo nga pag rollout sa bakuna sulod sa siyudad,” sumala sa EO.

Nakalatid sa Section 2 sa EO nagkanayon nga dili na kinahanglan ang paggamit og plastic barriers sa mga public utility vehicles (PUVs).

Hinuon, kinahanglang ipatuman gihapon sa mga drayber ug operator ang mandatory nga pagpatuman sa pagsul-ob sa face mask ug physical distancing sulod sa ilang mga unit.

Kahinumdoman nga sa pagsugod sa pandemya, usa sa mga lakang nga gipatuman sa gobyerno aron mapugngan ang pagkaylap sa COVID-19 mao ang paggamit sa mga plastik nga babag aron mapadayon ang gikinahanglan nga  kapasidad sulod sa pampublikong transportasyon ug pagpatuman sa social distancing sa mga pasahero.

Dugang pa sa EO, lakip usab nga gitangtang ang mga motorcycle barriers apan giawhag gihapon ang boluntaryong paggamit niini. (NW)