Pagbakuna sa mga menor de edad sa DavNor gidugok

Gidugok ang unang adlaw sa gipahigayong vaccination roll out sa Provincial Health Office Vaccination Team alang sa mga menor de edad (12-17 anyos) nga dunay comorbidity nga gipahigayon sa DavNor Clubhouse sa Sports Complex, Mankilam, Tagum City, Huwebes, Nobyembre 4, 2021. 

Sa maong adlaw natala ang kapin kon kulang sa 300 ka mga kabataan ang nakadawat na sa unang dose sa bakuna batok COVID-19.

Nasayran nga Pfizer vaccine ang gigamit nga bakuna alang sa mga menor de edad nga dunay comorbidity.

Sumala ni Provincial Vaccination Operation Center Head Dr. Eleanor Salva nagpakita kini og positibong tubag gikan sa mga kabataan ug mga ginikanan alang sa tawag sa pagpabakuna kontra COVID-19.

Padayon pahinumdum sa publiko  nga una muadto sa vaccination center kinahanglan nga siguraduhon nga magdala og medical certificate gikan sa pediatrician ang mga bata nga magpabakuna.

Dalahon usab ang birth certificate ug sa mga ginikanan nga ubanan ang ilang mga anak gikinahanglan usab nga magdala og dokumento sama sa ID nga magpamatuod nga sila ang ginikanan o guardian sa bata. (PR)