P7-M nga Multi-Purpose Tribal Hall para sa Santo Tomas, aprubado na

Giaprubahan na sa Office of the Presidente (OP) ang P7,000,000 nga Multi-Purpose Tribal Hall para sa Santo Tomas, Davao del Norte.

“Dako atong pasalamat kay President Rodrigo Duterte kay na approved ang atong gipangayo na Multi-Purpose Tribal Hall para sa lungsod sa Santo Tomas. Pinaagi sa maong building, atong mahatagan og pagtagad ang pahilunang implementasyon sa mga progamang ipatuman sa atoang Municipal Tribal Council,” sulti ni Mayor Ernesto Evangelista.

Ang pagpatukod sa nasangpit nga tribal hall usa lamang mga proyektong ipatukod sa administrasyong Evangelista diin ang pundo gikan sa Office of the President (OP) pinaagi kang Senator Christopher Lawrence “Bong” Go.

Ang administrasyon ni Evangelista misang-at sa hangyo sukad pa niadtong 2020 tungod kay ang maong proyekto sa imprastraktura dili mapundohan gamit ang mga pundo sa lokal nga kagamhanan.

Ang pagtukod sa Multi-Purpose Tribal Hall nalakip sa 2022 General Appropriations Act (GAA), sumala ni Municipal Administrator Atty. Elisa Evangelista nga nakadawat ug opisyal nga sulat gikan sa Opisina ni Senador Christopher Lawrence “Bong” Go.

“Padayon ang administrasyon ni Tatay Erning na mapalapdan ang serbisyong mahatag sa katawhang Tomasino pinaagi sa pag-access sa mga proyekto gikan sa National Government. Nagpasalamat kita sa tabang na gihatag sa atua ni President Duterte ug Senator Bong Go para sa Santo Tomas,” dugang sulti ni Evangelista.

Gihatagan og gimbug-aton ni Evangelista ang kamahinungdanon sa pagbaton og Multi-Purpose Tribal Hall, sumala niya nga ang “Evangelista administration nakahimo ug pipila ka pag-uswag sa paghimo ug pagpatuman sa mga programa ug proyekto alang sa mga lumad sa Santo Tomas.

Busa, gikinahanglan ang usa ka bilding aron mas masuportahan ang pagpatuman niini nga mga buluhaton.”

Dugang pa niya nga dako ang pagpaningkamot sa administrasyong Evangelista sa pagtrabaho uban sa mga IP ug sa National Commission on Indigenous Peoples (NCIP) dinhi sa Davao Region alang sa pag-uswag ug paglambo sa mga komunidad sa Ata-Manobo.