P5M nga riprapping canal project giturn-over na sa DavSur

Mubalor sa P5 milyon ang kantidad sa bag-ohay lamang nga nahuman nga riprapping canal project sa Probinsyal nga panggamhanan sa Davao del Sur.

Gipangunahan  mismo ni  Davao del Sur Gobernador Marc Cagas ang pagturn-over niini, Huwebes (Nobyembre 25) ngadto sa katawhan sa Barangay San Jose sa dakbayan sa Digos.

Gimuntar sa walo ka purok ubos sa nasangpit nga barangay ang maong proyekto diin gilangkuban sa Barangay Rose, Malinawon, Cagape, Jakosalem, San Francisco, Duranta, Mahogany, ug Madasigon.

Ang maong proyekto dugay ng gipangandoy ug gikahinaman  sa taga Barangay San Jose gumikan pirme nilang masinati ang pag-over flow sa tubig padulong sa dalan inig panahon sa ting-ulan.  Busa gikalipay sa katawhan ang maong proyekto.

Samtang sa pikas bahin, giawhag ni Governor Cagas ang katawhan sa pagsalmot sa National Vaccination Days nga ipahigayon karung Nobyembre 29, 30 ug Disyembre 1, 2021, giawhag sa Governor ang mga katawhan nga wala pa nakapabakuna. (NW)