P4-M nga Dairy Hub sa Mati City, gi-inagurahan

Personal nga gitambungan ni Mati City Mayor Michelle Rabat ang inagurasyon sa P4-million Dairy Hub nga gitukod sa Sitio Sudlon, Barangay Central ning syudad niadtong, Huwebes (Pebrero 10).

Kauban usab sa Mayor ang City Veterenarian nga si Dr. Marites Linsag-Erispe; kanhing administrator sa National Dairy Authority (NDA) Marilyn Mable; NDA officer-in-charge Marlon Flores; City Councilor Eric Rabat; ug Mati City Agriculture head Eleanor Sambas.

 Ang maong proyekto gikan sa buhatan sa Mati City Veterinary Services.

Tumong niini nga maka-produce og mga produkto sama sa fresh and flavored milk gikan sa mga lokal na dairy farmers ug processors sa Dakbayan.

Laraw usab sa City Veterinary Services Office (CVSO) nga mobuhat og frozen yoghurt (FROYU) ug ice cream bar. Sa kasamtangan ang Mati Dairy Hub naga-proseso og 100 ka litrong gatas matag semana.

Tumong sa CVSO na musaka pa kini ngadto sa 300 liters matag semana.

Base sa inisyal nga kasabutan, mohatag ang CVSO og suplay nga gatas ngadto sa Department of Education alang sa mga estudyante.

Malaumon ang CVSO na masugdan na ang pagbaligya sa ilang mga produkto sa sunod semana dungan sa pagsugod sa pagpamakuna sa mga batang edad 5-11 anyos.

Mapalit ang mga produkto sa Dairy Hub diha sa ilang mobile store, Pasalubong Center, mga eskwelahan, ug uban pang mga establisyemento.

Ang inisyal na presyo sa milkbars anaa sa P6.00 matag usa, samtang P50.00 hangtod P60.00 ang matag botelya sa gatas.