P1.1 -B submarine cable project sa Samal operational na sa tuig 2023.

Gibutyag ni Elvera Alngog, ang officer-in-charge sa Northern Davao Electric Cooperative Inc. (NORDECO) nga mukabat sa kapin kun kulang P1.1 bilyon ang kantidad sa proyektong submarine cable sa Island Garden City of Samal (Igacos) sa Davao del Norte.

Gibuhian sa opisyal ang maong pamahayag atol sa gipahitabong press conference Dominggo, (Hulyo 31) sa ilang buhatan sa Montevista, Davao de Oro.

Dugang sa opisyal nga ang maong proyekto ang tubag sa problema sa kuryente sa isla nga mahimong magamit na sunod tuig.

Sumala ni Alngog, anaa na sa 75 porsyentong nga makumpleto na ang maong proyekto, samtang ang nahibiling 25 porsyento mao na lamang ang pag-installar sa cable nga laumang mahuman usa matapos ang tuig.

“Ang cable fabricated siya from Italy, itransport siya dinhi padulong sa Pilipinas sunod bulan. Hopefully, this end of the year mataud na ang atong submarine cable sa Samal Island diin by next year matagamtaman na nato ang fully-implementation niini,” sulti ni Alngog.

Positibo si Alngog nga ang maong proyekto ang tubag sa problema sa isla ilabi na sa panginahanglanon sa kuryente.

“It is more than enough. It will suffice the power requirement in the island,” sulti ni Alngog.

Samtang, dako ang pasalamat sa mga naglangkob sa NORDECO human nga gi-veto ni Presidente Ferdinand “Bongbong” Marcos Jr., ang House Bill 10554 nga mupalapad sa franchise area sa Davao Light and Power Company (DLPC). Mipasalig sab sila sa ilang member-consumer-owners (MCOs) sa pagpalambo pa sa ilang serbisyo hangtud mahuman ang ilang prangkisa ngadto sa tuig 2028 ug ngadto na sa 2033.