NORDECO padayon ang prayer vigil alang sa hugot nga panaghiusa

Padayon gihapon sa pagpahigayon og prayer vigil ang Northern Davao Electric Cooperative, Inc. matag hapon kada adlaw.

Ang maong kalihokan usa lamang sa mga aktibidades sa electric cooperative (EC) aron mas mapahugtan ug maghiusa ang tanang konsumante ug trabahante batok sa hagit nga ilang kasamtangang gisagubang.

Luyo sa mga hagit ug pagsulay, sumala sa NORDECO, Inc. nga ilang ipadayon ug mas palig-onon nila ang paghatod og tiunay nga serbisyo sa mga miyembro-konsumante-tag-iya, inubanan sa giya sa labawng makagagahum.

Kahinumduman nga gikasubo sa NORDECO Inc. ang pag-apruba sa House Bill 09978 niadtong Nobyembre 29, 2021.

Giangkon sa NORDECO nga ‘wala kini mahatagan sa husto nga proseso aron matubag ang mga isyu nga gilabay batok kanila.

Sa usa ka pamahayag, ang NORDECO nagkanayon nga sa usa ka Legislative Franchise Committee hearing nga milungtad og usa ka oras ug 45 minutos pinaagi sa virtual platform, ang House Bill (HB) 09978 dali nga gidala ug naaprobahan bisan kung wala ang mga position paper gikan sa Department of Energy (DOE), National Electrification Administration (NEA), ug Energy Regulatory Commission (ERC) nga wala pa masumiter nga gipadayag sa ilang tagsa-tagsa ka mga representante.

“Ang NORDECO, Inc. kusganong misupak sa pagpasa sa HB No. 09978 o “An Act Granting Davao Light and Power Company, Inc. A Franchise to Establish, Operate, and Maintain, for Commercial Purposes and in the Public Interest, a Distribution System for the Conveyance of Electric Power to End-Users in the Municipality of Maco, in the Province of Davao de Oro, and the Municipalities of Asuncion, Kapalong, New Corella, San Isidro and Talaingod in the Province of Davao del Norte, and Ensuring the Continuous and Uninterrupted Suoply of Electricity in the Franchise Area,” nga gisulat ni AKO BICOL Partylist Rep. Alfredo Garbin Jr.  ( NW)