’No vaccine, no bonus”, dili tinuod sumala ni Mayor Sara

Walay kamatuoran nga dili makadawat og bonus ang dili bakunado nga empleyado sa kagamhanang lokal sa Davao City.

Mao kini giklaro mismo ni Mayor Sara Duterte atol sa programa niini sa Davao City Disaster Radio (DCDR) lunes, Nov 29 diin matud sa Mayor, walay polisiya ang siyudad nga ‘’No vaccine, No Bonus“.

Gipasabot lang sa Mayor nga ang gipagawas nya nga mando mao lang nga mamahimong prayoridad sa pag-renew sa  kontrata sa mga trabahante sa City Hall mao kadtong mga bakunado .



“They will not be prioritized for hiring sa January, particularly kining mga job orders. Sa atoang admin, ang permanent employees nato, naa nay gi-release na legal opinion na they can be reprimanded under the City Government of Davao kung dili sila magpabakuna,” paklaro ni Mayor Sara.


Kahinumduman nga niadtong September 16, 2021 gipagawas sa syudad ang Executive Order 45, Series of 2021 diin  nagmando sa  pagpa bakuna  sa  tanang mga  empleyado sa kagamhanang lokal lakip na plantilla, job order, contract of service ug mga boluntaryong empleyado ingon man consultants.

Hinuon adunay exemption sa maong mando depende sa gibug-aton sa rason sa usa ka  empleyado ug aduna kini  kamatuoran nga dili mahimong bakunahan ilabi na kung nasukip sa mga patakarang  nakalatid sa Department of Health. ( NW)