Mosupak sa 70% capacity sa PUJ, maka-multa

Gipahimangnoan sa City Transportation and Traffic Management Office (CTTMO) ang tanang driver sa publikong sakyanan kon PUJ nga sundon ang 70% passenger capacity sa ilang mga sakyanan ubos sa guidelines sa nagpadayong pandemya nga dala sa COVID 19.

Mag-atubang og multa nga PHP500.00 ang driver nga dunay kargang mga pasahero nga nilapas sa 70% passenger capacity.

Gipahinumduman ni CTTMO head Dionisio Abude ang tanang driver nga sundon ang social distancing sulod sa ilang mga sakyanan gumikan kay ang mga traffic enforcers mupatuman og balaud ug isyuhan og citation tickets ang malapason.

“Pahunongon gyud siya, kung sobra sa kapasidad, tiketan sila. Kay kung dili gud nimo tiketan magpadayon ang mga driver kay ok raman. Muagi man gyud sila og mga enforcer, muagi man gyud sila sa mga loading bay, mga yellow box, so makita gyud na more than sa capacity sa ilaha so matiketan sila ug kanunay sila matiketan luoy pud kaayo sila”, sulti ni Abude.

Kahinumduman nga giwatang na ni Mayor Sara Duterte ang paggamit sa motorcycle barriers, jeepney, ug uban pang public utility vehicle barriers epektibo niadtong Nobyembre 2, 2021.

Gilatid sa maong kamandoan nga samtang dili na kinahanglan ang mga barrier, ang mga drayber ug operator kinahanglan gihapon nga ipatuman ang mandatory nga pagsul-ob sa facemask ug pagsunod sa physical distancing sulod sa ilang mga yunit.

“Ang driver man gud unta ang dapat naay control, pagtan-aw ang kapasidad sa iyang sakyanan mao nagyud na siya. kung magpadungag siya iya na nang risk pag makita siya sa enforcer unya madakpan siya luoy kaayo siya. Dapat magdisiplina gyud ang mga driver,” dugang sulti ni Abude. (PR)