Mga Brgy. Kapitan sa Sta. Cruz, DavSur gipanghasi

Pipila karon sa mga Barangay Kapitan sa Sta. Cruz, Davao del Sur ang mipasibaw sa ilang kabalaka kalabot sa ilang mga nadawat nga gikaingong “death threat”. 

Subay sa pamahayag ni ABC President ug Barangay Tagabuli Chieftain Nonoy Lim nga duna matud pay kalabotan sa umaabot nga eleksyon ang ilang mga nadawat nga harassment ug death threat.

Giasoy ni Kapitan Lim, nga dunay tulo ka mga lalaki sakay sa duha ka mga motorsiklo ang niduol kaniya niadtong Pebrero 4 alas 4:30 sa hapon aron lang pahimangnoan nga dili na lang moapil sa politika, kon dili, mabutang sa peligro ang iyang pamilya.

Busa napugos si Lim nga mangayo gilayon og proteksyon gikan sa Philippine National Police.

“Actually nag pa-blotter gyud ko kay murag death threat gyud to sa akoa regarding atong nahitabo atong pitsa 4 alas 4:30, gi-adtoan ko ug 3 ka tao, duha ka motor,” saysay ni Lim.

Apan, wala pa matapos dinhi ang mga nadawat nga pagpanghulga ni Lim. Pebrero 5, dunay text messages siyang nadawat gikan sa usa ka anonymous.

“Kagabii Sunday February 5, nag text sa akoa alas 10 pasado ug dili maayo. Ana siya ug dili ko mag patoo, i-damay niya ang akoang pamilya kay dili daw ko dapat mag apil-apil, iyang buot pasabot. Nalibog ko kung unsa iyang buot ipasabot kay permanente daw siya naa sa amoang palibot ga-bantay,” asoy ni Kapitan Nonoy Lim.

Samtang, gipamatud-an sab ni Zone 1 Barangay Captain Ricky Taylaran ang mga gibuhiang pamahayag ni Kapitan Lim human makasinati usab sa maong gikaingong harassment.

Gipamatud-an usab ni Kapitan Nonoy Lim nga gawas ni Kapitan Taylaran nakasinati usab sa maong pagpanghulga sila si Brgy. Kapitan sa Barangay Coronon ug Barangay Tuban.

“Mao to siya, naalarma gyud mi, kay first time dinhi sa Sta. Cruz nga ingani ang pamaagi, kay sa una bisag unsa ka init wala man mi naka sinati ana, isapa pa ang amoang barangay wala man nagpili kinsay muadto dinhi as long as mukuha ug permit ug clearance open ni sa tanan basta dili lang mi hurawon,” sulti ni Lim.

Busa nanawagan karon ang mga Barangay Kapitan ngadto’s responsable niini pagpanghulga kanila nga dili sila hulgaon gumikan ilaha lamang gi-practice ang ilang katungod.

 “Panawagan nako ana, kung kinsa man mo, undangan ninyo na kay pasagdan nato ang tao mupili kung kinsa gyud ang angayan mulingkod diri,” panawagan ni Kapitan Nonoy.

Tungod sa ilang nasinatian, laraw karon ni Kapitan Nonoy nga moduso og resolusyon ngadto sa  PNP ug Armed Forces of the Philippines nga pakusgan ug pahugtan ang ilang  monitoring ug checkpoint operations sa ilang lugar ilabi na nga dunay mga armadong grupo ang gapanghasi karon sulod sa munisipalidad sa Sta. Cruz.