Menzi Beach Park dili sa Mati City LGU

Mipagula og pagpaklaro ang Mati City LGU kalabot sa luna sa Menzi Beach Park and Campsite sa Dahican Beach nga wala kini gipanag-iyahan sa lokal nga panggamhanan busa dili kini mamahimong gamiton nga basta-basta lamang.

Mao kini ang giklaro sa Mati City LGU human mikatag ang istorya nga himoon kining libre alang sa publiko sulod sa unom ka bulan kon ugaling mudaog ang usa ka kandidato pagka-mayor ning Dakbayan sa Mati.

Giklaro sa City of Mati LGU nga libre gayud ang pagsulod sa maong luna apan dili kini mamahimong mag-operate isip usa ka resort.

Subay sa Memorandum of Agreement tali sa City of Mati LGU ug sa Menzi Trust Fund Inc., nga maoy nanag-iya sa usa ug tunga sa ektaryang luna, mamahimong gamiton sa lokal nga panggamhanan ang Menzi Beach Park isip ecotourism facility sulod sa unom ka tuig gikan Enero 1, 2022 hangtud Disyembre 31, 2027.

Mubayad ang LGU og P500,000 isip tinuig nga renta ngadto sa Menzi Trust Fund sulod sa unang tulo ka tuig. Samtang P600,000 matag tuig sa nahibiling tulo ka tuig.

Nakabutang usab sa maong MOA Article 3.2.3 nga nagkinahanglang idevelop ang property subay sa “duly approved plan including site development plan, architectural plan, detailed engineering plans and detailed project estimates”.

Apil sa plano ang pagtukod sa Kagan Cultural Center and Marine Center/Museum nga napatik sulod sa proposed operational guidelines nga gisumitar sa City Tourism and Promotions Office.

Sumala ni Mati Tourism Officer Dashiel Indelible Jr nga wala gayud sila nagapabayad sa musulod sa Menzi Beach Park kon ang tumong niini dunay kalabutan sa ecotourism ug dili aron mangaligo lamang ug himoong tambayanan ang lugar.

Sumala ni Mayor Michelle Nakpil Rabat nga wala gayud sa ilang plano nga himoong resort ang Menzi Beach Park diin mamahimong makasulod ang bisan si kinsang gustong maligo sa Dahican Beach sama sa gibuhat sa miaging administrasyon.

“Government should not be competing with the private sector. They are heavily invested in their resort business and are taxpayers of the city. They cannot match the bottomless resources of government. The purpose of the complex is to support and enhance tourism in the city. That is why it is called Menzi Information Center,” segun ni Mayor Michelle.

Ilado ang Menzi Beach Park kaniadto isip usa ka resort nga mamahimong gamiton sa katawhan nga makabayad sa entrance fee.

Apan wala na kini tugti sa Menzi Trust Fund Inc. subay sa ilang bag-ong MOA tali sa Mati City LGU ubos sa administrasyon ni Mayor Michelle Nakpil Rabat.

Ang maong MOA gikinahanglang sundon gihapon sa mga musunod nga administrasyon og dili lamang sa kasamtangang administrasyon.