Kandidatura ni Piñol sa senado suportado sa pinakadakong pederasyon sa mag-uuma

Gi-endorso sa Federation of Free Farmers (FFF) si kanhi Agriculture secretary Emmanuel “Manny” Piñol sa iyang kandidatura  isip magpapiling senador karong umaabot nga eleksyon 2022.

Ang FFF,  diin 69 ka tuig na nga organisasyon sa mga mag-uuma ug dunay 200,000 ka mga myembro ang mipagula na sa ilang listahan sa mga kandidatong ilang suportahan karong umaabot nga eleksyon.

Pinaagi sa usa ka press statement nga gipagula sa organisasyon gipanganlan ni FFF Board Chairman ug kanhing Agriculture Secretary Leonardo Q. Montemayor ang mga kandidato nga ilang suportahan, usa na si senatorial aspirant Manny Piñol, ug laing upat ka mga kandidato mao sila Francis Escudero, Richard Gordon, Risa Hontiveros ug Jose Matula.

Gibasehan sa organisasyon ang ilang pagpili sa mga kandidato subay sa  ilang outstanding record sa pagpanerbisyo ug sa ilang lig-ong pagsuporta sa sektor sa agrikultura.

Si Piñol nagserbisyo isip Agriculture Secretary ubos sa Administrasyong Duterte gikan Hunyo 2016 hangtod Agosto 2019 apan sa ulahi mibalhin sa Mindanao Development Authority (MinDA) isip chairman.

Sila si Gordon ug Hontiveros mga re-electionist, si Escudero mobalik human sa 3 ka tuig nga paglingkod isip Gobernador sa Sorsogon samtang si Matula ang Presidente sa Federation of Free Workers.

“Our Board’s decision was based on these candidates’ outstanding record of public service and firm support for our agricultural sector, especially on critical concerns like Philippine membership in the Regional Comprehensive Economic Partnership (RCEP) free trade agreement,” sulti ni Montemayor. 

Gitukod niadtong 1953, ang FFF adunay halapad nga grassroots presence ug membership base nga mukabat og 200,000 ka mag-uuma, mangingisda ug uban pang mga mamumuo sa banika.

Mao kini ang prinsipal nga kaanib sa ABA farmers party-list coalition nga nagserbisyo sa 11th ug 12th Congress, ug sa ABA-AKO farmers-urban poor coalition sa 14th Congress.

Ang FFF miyembro-organisasyon sa National Trade Union Center-Philippines.