Home isolation dili na tugutan sa Davao City

Gikumpirma ni Dr. Michelle Schlosser ang tigpamaba sa Davao City COVID-19 Task Force nga wala nay ipahigayong home isolation sa mga pasyenteng dunay mild ug asymptomatic COVID-19 gumikan kaya na kining maakomodar Temporary Treatment and Monitoring Facility (TTMF) human namatikdan ang pag-ubos sa kaso sa COVID-19 sa syudad.

“Ato ng undangon ang pagpahigayon og home isolation gumikan kay gapahigayon lamang kita niini kung dunay surge. Sa karon, wala nata sa surge. Wala na tay surge busa, wala nay rason aron magpahigayon pa ta og home isolation gumikan duna na tay igong number of COVID beds. Dili nata magkulang. So, even ‘tong mga asymptomatic, we can accommodate them sa atong mga TTMFs,” sulti ni Schlosser.

Sugod niadtong Miyerkules ,Nobyembre 3  ang tanang pasyente nga nakasinati og mild symptoms o asymptomatic dawaton na sa TTMF.

Kahinumduman nga niadtong Septembre, gitugutan sa Davao City COVID-19 Task Force ang home isolation sa mga pasyenteng nagpositibo sa COVID-19 gumikan sa taas nga kaso.

Apan, kinahanglan ang pasyente dunay laing kwarto aron dili makaduol ang iyang pamilya kaniya, dunay kaugalingong bathroom/comfort room sa iyang kwarto ug kinahanglan nga walay myembro sa pamilya nga lakip vulnerable sector.

“Dili ta sure ani kung kinsa ang naka home isolation but sa ing-ani kababa sa active cases when we say active cases, this is for the past 14 days, this is very low. Ang atong positivity rate for this week is 7. That’s actually very low,” dugang sulti ni Schlosser.

Base sa Regional Situation Update sa COVID-19 sa Davao Region Nobyembre 04, 2021, gikan sa Department of Health (DOH) Davao Region, nakatala ang Davao City og 35 ka bag-ong kaso diin anaa na sa 678 ang total number sa kaso nga natala sa syudad. (PR)