Face to face classes sugdan na sa Mati City karong Marso

Sugdan na karong bulan sa Marso ang pinaka-unang face to face classes sa Dakbayan sa Mati human  sa  duha ka tuig nga modular learning ug online set-up.

Subay  niini  malamposon ang  nahimong inspeksyon sa Mati Incident Management Team (IMT),diin nakapasar ang Culian Integrated School sa Barangay Culian sa tanang criteria sa Department of Education (DepEd) nga himuong pilot school sa face-face classes.

Ang maong eskwelahan ang napili sa DepEd sa Mati isip pilot school alang sa pagahimoong face to face classes  nga pagasugdan karong Marso.

Andam na matud pa ang maong eskwelahan sa pagsugod sa klase apan

usa lamang ka classroom ang pagagamiton alang sa pagahimoong face to face class.

Gipaniguro sa Mati Incident Management Team nga makasunod sa minimum public health standards ang maong eskwelahan pinaagi sa pag-inspeksyon sa maong eskwelahan niadtong Pebrero 14.

Subay sa DepEd guidelines, 24 lamang ka estudyante ang mamahimong musulod sa classroom ug tungaon kini pinaagi sa 12 ka estudyante ang musulod sa buntag ug 12 sa hapon.

Ang estudyanteng mosalmot  sa face to face class, kaduha lamang sa usa ka semana mutungha sa eskwelahan ug ang nahibiling adlaw sa iyang pagtuon pagabuhaton na pinaagi sa module.

Ang pagbalik sa face to face classes nasubay sa mando sa National Inter-Agency Task Force diin kinahanglang kumpleto na sa bakuna kontra Covid-19 ang tanang teacher ug estudyante na mupartisipar.

Walay  recess nga pagabuhaton sulod sa tulunghaan ug kinahanglang dunay consent gikan sa ginikanan nga bakunado usab.

Sa kasamtangan, nangandam na ang DepEd Mati sa unang lakang sa pagbalik sa face to face classes sa siyudad .

Aduna nay 100 ka pribadong eskwelahan ang nagpahigayon  na sa ilang face to face classes sugod Nobyembre 2021.

Kining mga pribadong tulunghaan napili sa NIATF tungod sa ubos nga kaso sa Covid-19 ug taas nga vaccination rate sa ilang lugar.