Duterte Legacy Caravan ipahigayon sa Toril Gym karong April 29

Andam na ang  tanan alang sa ipahigayon nga Duterte Legacy Caravan  nga ipahigayon sa  Davao City karong  April 29, byernes  sa Toril Gym.

Tumong sa maong caravan nga  ipahibalo sa publiko mahitungod sa mga programa sa gobyerno, mga polisiya, ug mga paningkamot sa pagdala sa tinuod nga kausaban pinaagi sa pagpakita sa tinuod nga mga istorya gikan sa mga benepisyaryo sa mga landmark nga programa sa administrasyong Duterte.

Ingon man  ang  paghatod sa mga batakang serbisyo sa nagkalain-laing ahensya sa gobyerno ang ipautman atol  sa caravan.

Matud pa ni PCol Narciso Bayugo sa PRO XI  nga  mao kini ang unang Duterte Legacy sa Davao City apan nakahimo na og  mga serye sa community outreach activities o mini caravans sa tibuok Davao Region nga gipatuman sa Police Regional Office ug gisuportahan sa lain-laing national ug local government units.

Gipasabot sa opisyal nga  human gilunsad ang  Duterte Legacy caravan sa  Davao del Norte, daghang mga caravan nga gihimo pinaagi sa outreach activities nga mikabat na sa 1,306 ka mga aktibidad nga nakabenepisyo sa 460,899 ka indibidwal, nga adunay gibanabana nga kantidad nga P6.7 milyones nga balor sa mga batakang serbisyo nga gihatag sa katawhan.

Ubay ubay sa mga serbisyo nga gihatag atol sa maong mga caravan naglakip sa pag-isyu sa national police clearance, pag-apod-apod sa mga liso sa utanon, technical consultation sa mga mag-uuma, tinuig nga kumpirmasyon sa pensiyonado, paghatag og scholarship, medical ug dental mission, ug daghan pa.

Sa maong umalabot nga caravan dinhi sa syudad sa Davao City, ubay ubay sa mga nasyonal nga ahenscya sa gobyerno ang nagpadayag nga muapil aron ipakita ang nagkadaiyang mandatos ug mga serbisyo ngadto sa publiko.

Isa na niini ang ang Department of Health anaa aron sa paghatag ug medikal nga konsultasyon ug pag-apod-apod sa Kalinga Kits; ang NCIP aron  mohatag ug libreng medikal ug legal nga konsultasyon; ang Philippine Statistics Authority  sa Philippine ID System Registration; ang Technical Education and Skills Development Authority skills demo sa Agricultural Drone Level II ug Bartending NCII.

Ang Duterte Legacy Caravan nahiuyon sa Executive Order 137 nga nag-institutionalize sa Aid and Humanitarian Operations Nationwide Convergence Program aron mapadali ug maharmonya ang hinabang ug humanitarian nga tabang sa National Government Agencies ngadto sa labing apektado ug huyang nga mga sektor ug komunidad.(PIA/ETIsidro)