Dul-an 400 ka mga doktor sa GenSan mideklarar sa ilang suporta sa UniTeam

Dul-an 400 ka mga doktor gikan sa General Santos City ug kasikbit nga mga probinsya ang mideklarar sa ilang suporta sa tandem ni presidential frontrunner Ferdinand ‘Bongbong’ Marcos Jr ug sa iyang running-mate nga si Inday Sara Duterte.

Nakigkita si Marcos sa labing menos 20 ka mga doktor gikan sa General Santos City niadtong Domingo nga nagtawag sa ilang kaugalingon nga “UniteaMD”, diin sila misaad sa ilang suporta sa BBM-Sara UniTeam.

Gipangunahan sa ilang tigpamaba ug presidente sa medical society nga si Dr. Jun Demontaño, ang grupo niingon nga ang ilang han-ay nagsuporta sa UniTeam tungod kay sila nagtoo nga ang tandem makapalig-on ug makasuporta sa nagkalain-laing programa alang sa sektor sa panglawas.

“Kami adunay 380 ka mga doktor nga lig-on sa akong grupo nga hingpit nga nagsuporta sa BBM ug Sara, pero 20 lang kami nga ania dinhi, nagtoo kami nga matabangan nilang duha ang medical society, andam kami nga makigtinabangay kanila,” matud ni Dr. Demontaño.

“Naningkamot mi sa pag-imprinta sa logo ug mga t-shirt ,tawag namo sa among grupo kay UniteaMD. Pamatuod lang kini nga tibuok ang among suporta sa tambalan ni BBM ug Sara,” dugang pa niya.

Si Demontaño niingon nga kombinsido sila nga ang UniTeam adunay mga programa nga gidesinyo sa pagpauswag sa kaayohan sa mga health workers ug sa public health system.

“Nasayod mi nga matabangan kami ni BBM ug Sara, ilabina sa pag-ayo sa PhilHealth, dili lang sa ospital apil usab sa mga doktor, sa ilang abilidad ug kasinatian nga mapakusog nila ang Universal Health Care,” matud niya.

Matud pa ni Demontaño nga andam silang makigtambayayong kang Marcos ug Duterte sama kaniya naghatag gibug-aton sa panginahanglan sa pagpaminaw sa ilang mga sugyot kon bahin sa mga isyu sa panglawas.

“Kinahanglan usab nga paminawon ang mga doktor, makahatag mi og sugyot kung unsaon pagpalabo ang implementasyon sa Universal Health Care ug uban pang mga programa, andam kaming motabang,” matud niya.

Sa iyang bahin, si Marcos nga maoy Partido Federal ng Pilipinas (PFP) standard-bearer midayeg sa mga sakripisyo ug paningkamot sa mga doktor ug sa tanang health practitioners sa pakigbatok sa pandemya.

“Palihog tugoti ko nga ipahayag ang pasalamat sa katawhang Pilipino sa tanan natong mga frontliners, sa atong mga doktor, nars, ug mga kawani sa medikal nga nagtrabaho pag-ayo sa miaging duha ka tuig aron magpabilin kitang himsog. Nasayod ko sa inyong mga sakripisyo nga gihimo , ang risgo nga inyong gi-atubang ug bisan pa nagpadayon kamo sa pagtrabaho ug pagkamatinud-anon sa inyong panumpa, labi na ang UniteaMD,” ingon ni Marcos.

Nagpasalamat usab si Marcos sa UniteaMD sa suporta nga ilang gihatag sa tibuok UniTeam.

“Ang inyong pagpadayag sa suporta ug pagsalig dili lang para sa atong mga kandidato kon dili alang usab sa ideya ug konsepto ug bili sa panaghiusa nga gitoohan natong tanan tungod kay kini usa ka butang nga gikinahanglan aron ang atong nasud mouswag. Daghan kaayong salamat sa inyong tabang, sa inyong suporta,” matud niya.

Si Marcos misaad nga kung sila mapili, ang mga doktor, nars ug ubang mga health worker maoy prayoridad sa UniTeam.

“Ang atong mga doktor kay suportado kaayo sa UniTeam, nasayod kami kung unsa ang kalisod, unsa ka kapoy ug kahadlok ang giatubang ninyo, laoman ninyo kung ugaling kamo ang palaron, makigtambayayong kami, kanunay kamo nga ania sa among kasing-kasing ug hunahuna tungod sa sakripisyo ninyo sa nasud,” matud niya.