Dul-an 30,000 drivers sa Davao City nabakunahan batok COVID-19

Mikabat na sa 29,576 public utility vehicle (PUV) drivers sa syudad ang nakadawat na og bakuna kontra COVID-19 pinaagi sa vaccination drive sa lokal nga panggamhanan sa Davao.

Dunay tulo ka vaccination sites ang gitagana alang sa mga PUV drivers nga mao ang Agro Compound, Calinan, ug Panacan.

Sa kasamtangan, anaa na sa 15,701 ka mga driver ang nakadawat na sa ilang unang dose sa bakuna ug anaa na sa 13,875 ang fully vaccinated.

Kahinumduman nga nalakip sa Priority A4 kon mga essential workers ang mga PUV drivers nga angayang makadawat sa bakuna kontra COVID-19.

Samtang, gipahibalo nga padayon pa gihapon ang vaccination drive sa matag barangay nga gipangunahan sa Sangguniang Panlungsod members kauban ang buhatan ni Vice Mayor Sebastian ‘Baste’ Duterte.

Sa kinatibuk-a, ang Davao City nakatala na og 882,818 indibidwal nga nakadawat na og first dose sa bakuna kontra COVID-19 ug anaa na sa 788,001 indibidwal ang fully vaccinated na.

Nasayran nga target sa  siyudad ang 1.2 million population protection aron makab-ot ang herd immunity una matapos karong bulana. (PR)