Dul-an 300 kilos nga illegal nga karne sa Mati City, nakumpiska

Mobalor sa P82,000 ang kantidad sa illegal nga karne nga nakumpiska sa Task Force (TF) Bantay Karne sa Mati City.

Base sa report gikan sa City Veterinary Services Office, TF Bantay Karne, kauban ang National Meat Inspection Services XI enforcement team atol sa gipahigayong meat inspection niadtong Miyerkules, Pebrero 2.

Mukabat sa 292.2 kilos nga illegal nga karne ang ilang nahipos nga gikan sa pipila ka pwesto sa tindahan, malls, ug meat shops sa syudad.

Nakumpiska sa grupo ang 194 kilos nga daut na nga karne nga mukantidad og P68,870; 30.1 kilos sa karneng manok nga anaa sa P5,538.04 ang kantidad; ug 68.1 kilos sa “hotdog processed meat” nga mukantidad sab og P8,172 , diin mosumada  sa  P82,580.40 ang tanang nakumpiskang karne.

Nasayran nga usa sa mga meat shop nga nadakpan nga gapamaligya kini og daut na nga karne diin nakalapas kini sa City Ordinance No. 71 series of 2011 ug Republic Act 10536.

Duna usab meat shop nga gamaligya apan walay meat inspection certificate, samtang ang ubang tindahan gipahimangnoan kalabot sa “meat safety” sa paghandle sa mga karne.

Gawas sa mga karne, nakumpiska usab ang usa ka drum nga ginagamit nga pabukalanan og tubig aron ilapwa sa mga baboy ug manok. Nakuha ang maong drum didto sa karaang slaughterhouse sa Liberty, Barangay Central.

Ang mga nakumpiska gilayong gilubong sa Slaughterhouse City Condemnation Facility sa Sitio Sudlon, Brgy. Central.