DTI-11 nag-awhag sa publilko nga sayong mamalit og pang noche Buena

Bisan pa man nga gitakdang ipagawas pa lang ang Suggested Retail Price (SRP) sa mga produktong pang noche buena sa bisan unsang adlawa gikan karon, apan nag awhag na daan ang Department of Trade and Industry Davao region (DTI-11) sa publiko nga mamalit na daan sa kinahanglan karong kapaskohan.

Sumala pa ni Dexter Bermudez kinsa Senior Trade and Development Specialist sa DTI -11 atol sa pakighinabi kaniya sa NewsWeb nga dakong tabang sa katawhan nga malikayan ang pagdasok ilabi na karong panahon sa pandemya kung sayo mamalit og pang noche buena.

Tambag lang ni Bermudez nga sigurohong pasok sa budget ug susihon kanunay ang label sa produkto ilabi na ang expiry date aron dili mabiktima sa dili maayong klase sa produkto nga gibaligya.

Sa kanunay ang DTI-11 padayong nagmonitor sa mga nag unang palaliton ilabi na karong kapaskohan aron walay mopahimulos sa sitwasyon.

Matud pa ni Bermudez nga  laumang sunod semana sa pag-gawas sa listahan sa SRP sa mga noche buena products sagunson na sab ang himuon nga surpresang inspections sa mga dagkong establisimento nga namaligya og  produktong pang noche buena.

Sagad sa mga presyong imonitor sa DTI mao kadtong mga produktong gilangkuban sa ham, fruit cocktail, keso de bola, cheese, sandwich spread, mayonnaise, pasta—spaghetti noodles, elbow, ug salad macaroni—spaghetti sauce, tomato sauce, ingon man all-purpose cream.

Kahinumduman nga nagpagawas na sab og pamahayag si DTI Secretary Ramon Lopez nga nagkanayong, “in the midst of the pandemic, the spirit of Christmas will continue to draw many of our consumers to buy their favorite noche buena products for their families to be served on their tables. Thus, the Department assures the public of the availability of supply and stability of prices of these items.” (NW)