DavNor andam na alang sa ipahigayong Bayanihan Bakunahan

Dakong hagit alang sa tibuok probinsya sa Davao del Norte ang 34.5% fully vaccinated rate subay sa natalang datos niadtong Nobyembre 21 kun diin ubos pa kaayo kini sa target nga 70% aron makab-ot sa probinsya ang herd immunity.

Anaa pa lamang sa 48.6% ang mga nakadawat og unang dose sa bakuna samtang  ang gikinahanglang bakunahan sa  probinsya angay 744,405 ka mga tawo.

Busa nangandam ang Davao del Norte Provincial, City ug Municipal Health Offices alang sa dungan nga tulo ka adlaw nga Bayanihan Bakunahan sa tibuok nasod karong Nobyembre 29 hangtod Disyembre 1, 2021.

Sumala ni Provincial Vaccination Operation Center Head Dr. Eleanor Salva nga bisan holiday ang Nobyembre 30 kinahanglan silang motrabaho aron mas daghang tawo ang mabakunahan.

“Nganong giapil man nang 30 nga holiday? Giapil na nga holiday kay National Heroes Day na siya. And we consider nga magiging hero pod ta kay bisan holiday manarbaho man ta. So considered ta nga hero ana nga adlaw,” pagdasig ni Dr. Salva atubangan sa mga city ug municipal health officers, administrators ug mga frontliners gikan sa 11 ka LGUs sa probinsya.

Sa ipahigayong nga Bayanihan Bakunahan, target sa tibuok pwersa sa hiniusang mga frontliners sa Davao del Norte nga mabakunahan ang 168,704 ka tawo sulod sa tulo ka adlaw.

Busa, nanawagan ang PHO sa tanang wala pa’y bakuna nga moadto na sa ilang mga health centers ug mga vaccination sites aron mabakunahan kontra COVID-19.

Kahinumduman nga gikan sa pagsugod sa RESBAKUNA niadtong Marso 2021 hangtod Nobyembre 21, ang lungsod sa Sto. Tomas ang dunay pinakataas nga vaccination rate nga 42.6% fully vaccinated ug 60.5% ang nakadawat sa first dose.

Samtang, ang lungsod sa Talaingod mao sab ang dunay pinakaubos nga fully vaccinated rate nga 12.5% ug 14.8% ang nakadawat og first dose, hinungdan nga ang tibuok probinsya duna lamang 34.5% vaccination rate.

Samtang, niadtong Martes (Nob 23), 105 ka mga Persons with Deprived Liberty (PDL) diha sa Provincial Jail ang nakadawat na og bakuna kontra COVID 19. (NW)