Davao de Oro Governor mipadayag og suporta ug gipasalamatan ang NORDECO, Inc.

Gipasalamatan ni Davao de Oro Governor Jayvee Tyron Uy ang Northern Davao Electric Cooperative Inc. gumikan sa serbisyo ug tabang nga gihatag niini sa mga miyembro-konsumante panahon sa pandemya ilabi na sa ilang mga programa nga gihatag ngadtos lainlaing mga komunidad.

Gitumbok sa Gobernador ang dakong papel sa NORDECO sa pagkab-ot sa nagkalain-laing kalamboan sa probinsiya.

Gumikan sa kasamtangang komosyon tali sa duha ka power providers, usa ka manifesto nga gipirmahan sa 94,000 Nordeco member-consumers misupak sa lakang sa pribatisasyon.

“Ang akong suporta naa sa Nordeco sukad sila nag-atiman sa among mga problema sa kuryente. Atong tan-awon kung unsa ang mahitabo kung kini magpadayon,” dugang sulti ni Uy.

Kahibaluan nga nag-atubang ang NORDECO karon sa dakong problema sa posibleng ‘take-over’ sa Davao Light and Power Co. (DLPC).

Gani bag-uhay lang nga nipasar sa House of Representatives sa ikatulo ug katapusang pagbasa niadtong Enero 24, ang House Bill 10554, ang pagpalapad sa franchise area sa DLPC ngadto sa Davao del Norte sa mga siyudad sa Tagum, Igacos (Samal), ug mga lungsod sa Kapalong, New Corella, Talaingod, Asuncion, ug San Isidro, ingon man ang lungsod sa Maco sa Davao de Oro.

“Dili pa kini conclusive. Mahimong maaprobahan sa Kongreso apan muagi pa kini sa Senado,” ingon niya.

Sa laing bahin, hugot nga gisupak sa National Electrification Administration (NEA) ang lakang sa Davao Light & Power Company nga itugyan ang pipila ka mga progresibong siyudad ug lungsod sa Davao del Norte ug Davao de Oro ubos sa ilang franchise areas.

Gidayeg sa NEA ang NORDECO isip usa sa mga maayong kooperatiba sa kuryente sa nasud sa wala pa kini nabalda sa pito ka tuig nga panagbangi tali sa DANECO-NEA ug DANECO-CDA.