Davao City mitagana og P9.9 M alang sa 14 ka lugar nga gibagyo

Gikumpirma mismo ni Mayor Sara Duterte nga mohatag og tabang pinansyal ang Davao City alang sa mga lugar nga apektadu sa bagyong Odette.

Matud sa Mayor, adunay tag P1-million financial assistance ang ihatag sa matag probinsya nga gilangkuban sa  Surigao del Norte, Dinagat Island, Guimaras, Bohol, Cebu, Southern Leyte, ug Surigao del Sur.

Samtang sa mga siyudad sa Butuan, Iloilo, Cabadbaran, ug Surigao makadawat kini og tag  P500,000, ug ang mga  munisipalidad sa Kitcharao, Cagwait, ug Mainit makadawat og tag P300,000.

Nasayran nga ang nahisgutang financial assistance nag-gikan sa pundo sa disaster sa siyudad diin gi-endorso sa City Disaster Risk Reduction and Management Council, ug gi-aprobahan niadtong December 23, pinaagi sa special session  sa 19th City Council.

Giklaro sa mayor nga kadtong mga lugar nga nadeklarang ubos sa state of calamity ang makadawat sa maong cash assistance.

“Kaning atoang disaster funds can only be given to areas who have already declared that they are in a state of calamity,” sulti pa sa mayor.

Una niini, nagpadala na sab ang siyudad og mga personahe labi na response team ngadto sa Bohol alang sa medical and rescue missions niadtong  December 26.

Ang maong response team partikular nga motabang sa mga lugar sa Bohol sama sa Ubay, Pitogo, Carlos P. Garcia, Loboc, ug Inabanga.