Davao City gitun-an ang restriksyon sa pag-gawas sa 11 anyos paubos

Gitun-an karon sa kagamhanang lokal sa Davao City ang posibleng pagbutang og restriksyon sa lihuk o paggawas sa mga batang edad11anyos paubos ilabi na sa mga lugar nga daghang tao sama sa mall.  


Gibutyag ni Mayor Sara Duterte atol sa radio program niini niadtong Lunes nga gihisgutan ang maong lakang atol sa meeting sa COVID-19 Task Force apan wala pay resolusyon nga na aprobahan. 

“Sa pagkakaron, ang ginagamit gihapon nato is ang guide sa IATF sa national. Sa atoang level, there are continued discussions. The discussion will be continued at the level of the Response Cluster bago nila isaka balik dinhi sa  Covid-19 Task Force,” sulti pa ni Mayor Sara.


Giklaro sa mayor nga ang posibleng restriksyon nga  ipatuman alang lamang sa mga bata nga nagpangidaron og 11 anyos paubos sanglit sila ang sector nga dili pa mahimong bakunahan batok COVID-19 ug delikadong matakdan sa virus. 

Nagkanayon si Mayor Sara nga nakita gayud sa mga otoridad nga daghang mga ginikanan ang nagdala sa ilang mga anak ngadto sa mga mall ilabi na panahon sa weekend.  


Pahimangno na lamang sa Mayor ngadto sa mga hamtong nga likayan ang pagdala sa mga bata ngadto sa nagdasok nga mga tao aron malikayan ang infection sa virus.  

Sa usa ka pamahayag ni COVID-19 Task Force Spokesperson Dr. Michelle Schlosser nga dako gayud ang risgo nga  matakdan sa virus ang mga batang nag edad 11 anyos paubos tungod kay sila nalakip sa dili pa bakunado nga populasyon.

Subay sa padayong vaccination roll out sa gobyerno bugtong mga menor de edad nga 12 hangtud 17 anyos ang  gitugutan pa nga mabakunahan. 

Sa karon ang Davao City ubos sa Alert Level 2 hangtud November 30,apan wala nalakip sa gipatuman nga restrictions ang kalihukan sa mga tao sa tanang edad. ( NW)