COVID-19 TF nagpahimangno nga istriktong sundon ang 50%capacity sulod sa sinehan

Gipahimangno karon sa Davao City COVID-19 Task Force nga istriktong sundon ang 50% capacity sa mga mosulod sa sinehan ubos sa alert level 2 nga quarantine classification status sa dakbayan.

Matud pa ni COVID-19 TF spokesperson Dr. Michelle Schlosser nga gitugotan sa lokal nga panggamhanan ang subling pag-abli sa mga sinehan apan 50% capacity lamang ang mahimong makasulod.

Gawas niini angay usab timan-an nga maka operate ang sinehan diin sundon gihapon ang minimum public health standard (MPHS) ug uban pang mga protocols.

Kahinumduman nga niadtong Nobyembre 13, gilu-agan ang quarantine restrictions sa syudad sa Alert Level 2 ug molungtad pa kini hangtud sa December 15, 2021.  

Ubos niini, tugutan na nga maka-operate pagbalik ang mga indoor venues lakip na ang mga sinehan ug mosunod na sab ang contact sports apan sa pag ehersisyo lang ug dili pang tournament.

Abli kini alang sa tanan bakunado o dili, lakip sab ang mga nag-edad 18 anyos paubos.

Apan gikinahanglan lang nga ang tanang empleyado sa establisyemento fully vaccinated batok sa COVID-19 ug hugtanon nga sundon ang health protocol. 

Samtang aduna nay pipila ka mga dagkong tindahan sa syudad ang mipagula na og pahibalo sa ilang subling pag-abli sa sinehan gamit ang ilang social media platforms karung adlawa, Disyembre 1. (NW)