Coco farmers sa Mati nakadawat og ayuda gikan sa PCA

Siento baynte otso ka mga coconut farmers sa Mati City ang nakadawat og insentibo gikan sa Philippine Coconut Authority (PCA 11), Miyerkules, December 1, 2021 

Ang maong kalihokan usa sa programa sa PCA aron mahatagan og dugang pangita ang mga mag-uuma sa lubi.

Sa maong programa, ang mga mag-uuma nga dunay usa ka ektaryang tanom nga lubi makadawat og insentibo nga P2,000 diin 30 ka mga coco farmers ang nakadawat niini.

Samtang, 98 ka coco farmers usab ang nakadawat og tig-P1,000 nga dunay tunga sa ektaryang luna.

Sa Mati Cultural Center, Barangay Sainz   gipahigayon ang distribusyon sa maong insentibo nga gitambungan ni Allan Andrada, ang Technical Assistant ni Mayor Michelle Nakpil Rabat; Rhoieliza E. Recla, Provincial Manager sa PCA Davao Oriental; Francisco Pabio, Jr., ang Small Coconut Farmers Organization Federated President sa Mati; ug mga benepisyaryo sa maong programa.

Sa mensahe nga gipadala ni Mayor Michelle pinaagi kang Allan Andrada, dako ang pasalamat sa Mayor sa tabang nga nadawat sa mga mag-uuma sa lubi kay nahatagan sila og pagtagad sa Philippine Coconut Authority.

Samtang dako usab  ang pasalamat ni Ruben Salac Sr., usa ka mag-uuma sa lubi, sa iyang nadawat nga dos mil pesos gikan sa PCA tungod dako na matud pa kining tabang kanila aron mas mapalambo pa ang ilang mga gitanom sulod sa ilang yuta.

Gawas sa insentibo nga cash, mihatag usab ang PCA og libreng seedlings ug fertilizers sa mga mag-uuma.

Mobalor sa P842,000 ang kinatibuk-ang kantidad nga gitagana sa PCA alang sa maong insentibo sa mga mag-uuma sa lubi nga ipanghatag “in tranches”.  (NW)