Bise Mayor sa Cateel DavOr milingkod isip acting Mayor sa lungsod

Mi-asumer isip acting Mayor sa Cateel, Davao Oriental si Vice Mayor Engr. Patrocenio ‘Inyong’ Veroy, Lunes (Abril 4).

Sa interbyu niadtong Lunes kang Vice-Mayor Veroy, matud niya nga ni-asumer siya sa katungdanan ni Mayor Erlinda Nuñez gumikan kay wala na mo-report sa katungdanan ang local chief executive sukad pa niadtong milabayng tuig gawas lang sa panagsa nga pagduaw.

Sa kopya sa Memorandum nga gibitbit ni Veroy atol sa iyang pag-asumer nga dunay subject nga “Assumption to Office” pinetsahan April 4, 2022, gibutyag ni Veroy nga “incapacitated” na ang kasamtangang mayor nga si Erlinda Nuñez sa paghimo sa iyang katungdanan isip Municipal Mayor maoy nagtukmod kaniya nga mo-assume isip Acting Municipal Mayor.

Pipila matud pang importanteng okasyon sa Munisipyo wala magpakita ang Mayor. Sama na lamang niadtong State of the Municipal Address (SOMA), selebrasyon sa Women’s Month, ug dunay mga gipahigayong kasal sa munisipyo apan dili ang mayor ang nagsolemnize inay Sangguniang Bayan members.

“Sama sa nahitabo kagahapon [Abril 3], naay emergency. Adunay pagbaha dinhi sa pipila sa atong mga barangay. Adunay problema nga kinahanglang atubangon,” dugang ni Veroy.

Sumala ni Veroy nga sa maong problema, nahadlok siya nga basig mapasanginlan siya nga “dereliction of duty” tungod sa wala pag-insister sa iyang moral nga obligasyon isip bise mayor.

Hinuon, gipaklaro ni Veroy nga andam siya mohunong sa pag-function isip acting mayor sa oras nga mopatim-aw na sa iyahang opisina si Mayor Nuñez.

Apan, dili na sab limod sa Cateelenyos nga ginapailawom sa medikasyon si Mayor Nuñez human kini na-ospital niadtong milabayng tuig apan nagpabiling sikreto ang health condition niini.

Gisulayan sa mga tigbalita nga makuha ang bahin sa mayor, apan sumala sa mga guwardiya mga mao’y miatubang wala sa iyahang balay ang Mayor tua matud pa kini sa Davao City.

DISCLAIMER: Abli ang Newsweb nga mahinabi ang kampo ni Mayor Nuñez aron makuha ang ilahang tubag batok sa mga alegasyon nga gibato kanila.