BAROG subling nagkatigom aron suportahan ang BBM-SARA tandem

Subling nagkatigom ang Batan-on Alang kay Rody Gihapon (BAROG) aron suportaran ang kandidatura nila presidential aspirant Ferdinand “Bongbong” Marcos Jr. ug running mate Mayor Sara Duterte, sa usa ka hotel sa Dabaw, Domingo (Pebrero 20). 

Usa ka volunteer youth group niadtong 2001 ang BAROG nga gasuporta sa politikanhong byahe ni Mayor Rodrigo Duterte.

Subling nagkatigom ang organisasyon niadtong 2021 isip BAROG 2.0 aron suportaran ang kampanya ni BBM-SARA sa pagka-presidente ug bise presidente. 

Sumala ni BAROG 2.0 spokesperson Alex Into, nga nahimo ng usa ka multisectoral ang nasangpit nga organisasyon gumikan sa daghang panawagan sa lain-laing sector nga muapil sa kampanya. 

“Ang among tumong ani ipadayon gyud ang nabuhat ni Mayor Rody Duterte, natan-aw namo sa tanang nanagan ang tandem lang ni BBM-SARA ang dunay kapasidad nga mupadayon sa program ni Mayor Rody Duterte,” sulti ni Into. 

Usa matud pa sa nahimong basehan sa organisasyon sa ilang gipiling politiko nga  suportaran mao ang mga programang gihimo ug nasugdan. 

“Naa ta sa saktong dalan sulod sa unom ka tuig ubos sa Duterte administration. Adunay singgit nga ipadayon niya ang pagserbisyo sa nasud apan nasayod kita nga wala kini gitugot sa balaod. Nakita namo nga ang tandem ni BBM-SARA ang dunay katakos nga mupadayon sa nasugdan ni Presidente Duterte,” dugang sulti ni Into. 

Sa kasamtangan, ang BAROG2.0 dunay kapin kun kulang 7,000 ka myembro, nga boluntaryong gasuporta sa ilang napiling kandidato. 

Ang BAROG 2.0 gipangkuban sa nagkalain-laing sektor sama sa kabatan-onan, indigenous people (IP), kababayen-an, LGBT (lesbian, gay, bisexual, and transgender), riders, negosyante, isports, women, ug uban pa.