Bag-ong multi-purpose building sa Sixto Babao Elementary School gisusi ni Cong. Garcia

Hingpit ng natapos ang bag-ong multi-purpose building sa Sixto Babao Elementary School nga sakop sa Barangay Ilang ug ning bag-ohay  lamang  gisusi kini mismo ni  2nd District Congressman Vincent Garcia kauban si School Principal Andres Perez. 

Nasayran nga usa ka single-storey building ang proyekto nga dunay tulo ka classrooms apan wala pa karon gibutangan og division hinungdan nga ang resulta nahimong usa ka lapad nga multi-purpose building.

Atol sa pakighinabi kang Principal Andy Perez, daghang pang posibilidad nga magamit ang bag-ong gambalay.

Kini sama na lang nga mahimong gamiton kini isip tulo ka dugang classrooms.

Mahimo sab nga gamiton kini isip feeding center para sa mga estudyante, o kaha mahimong assembly area alang sa mga ginikanan o mga magtutudlo.

Taliwala sa nasinating pandemya karong panahona, walay puas ang pagpatuman sa public works projects nga gisugyot ug ubos sa inisyatibo ni Congressman Vince.

Gilauman nga sa taknang makalabang na sa COVID 19 pandemic ug mobalik na sa hingpit ang face to face classes sa mga public schools nagkanayon si Cong. Vince nga: “dakung tabang kining bag-ong multi-purpose building nato para sa mga estudyante, magtutudlo ug ginikanan ng Sixto Babao Elementary School.” (NW)