Bag-ong ‘mobile kitchen’ gipalit sa Santo Tomas LGU

Mikantidad sa P2.4 milyon ang bag-ong palit nga mobile kitchen sa lokal nga panggamhanan sa Santo Tomas, Davao del Norte.

Ang bag-ong palit nga mobile kitchen sumala ni Santo Tomas Mayor Ernesto “Tatay Erning” Evangelista paga -gamiton aron mas paspas pa ang paghatud og init nga pagkaon ngadto sa mga nabiktima sa katalagman.

Giasoy ni Evangelista nga ang maong mobile kitchen adunay public address system, water dispense, waste tank, food burner, cabinet working table, lavatory, kitchen utensils, ug uban pa.

“Nipalit kita og bag-ong mobile kitchen para atong pakusgan ang paghatag og serbisyo sa katawhang Tomasino ilabi na sa mga disaster operasyon nato sa local government of Santo Tomas,” sulti ni Evangelista.

Samtang, sumala ni Leilani Rafol ang OIC sa Municipal Social Welfare and  Development Office tawagon nga “Kusina Ni Tomas” ang mobile kitchen mo-akomodar sa mga informal settlers ug mga pamilyang kabus sa komunidad atol sa disaster response operations.Gawas sa paghatud og init nga pagkaon atol sa katalagman, lauman usab nga ang ubang sektor sa komunidad makabenepisyo sa mobile kitchen ug makatabang kini sa operasyon sa Municipal Social Welfare and Development Office (MSWDO) ug Municipal Disaster Risk Reduction and Management Office (MDRRMO).