96,744 target bakunahan sa Davao Oriental karong Nov. 29 – Dec. 1

Gitarget sa Probinsiya sa Davao Oriental ang pagbakuna sa mokabat 96,744 ka tao atol sa Bayanihan Bakunahan kon National Vaccination Day nga gitakdang ipahigayon gikan November 29 hangtud December 1, karong tuiga.

Sumala pa ni Davao Oriental Provincial Health Officer II Dr. Reden Bersaldo, nagpasabot kini nga adunay target nga 32,248 ang bakunahan matag adlaw sulod sa tulo ka adlaw nga aktibidad.

Si Dr. Bersaldo sab ang Action Officer sa Provincial Task Force on COVID-19 kinsa nagkanayon nga pagatutokan sa bakunahan mao ang pediatric population kon edad 12 to 17 years old, senior citizens, frontline personnel sa mga essential sectors ug mga nalakip sa kabus nga populasyon.

Ang tulo ka adlaw nga Bayanihan Bakunahan adunay tinguha nga makabakuna og mga taong wala pa bakunahi aron makab-ot ang herd immunity.

Sa Davao Region, gitarget sa Department of Health-XI nga makabakuna og mokabat sa 753,294 ka mga tao.

Subay sa provincial data, ang Davao Oriental adunay total population nga 607,851 ug 70% sa population moabot sa 425,494.

Sa karon, natala ang 214,857 nga nabakunahan diin 50.50% sa total target nga angay bakunahan.

Nasayran sab nga ang Davao Oriental maoy usa sa labing taas nga natala ang vaccination status sa rehiyon, diin nagsunod kini sa Davao City.

Ang provincial kickoff alang sa Bayanihan Bakunahan gitakdang ipahigayon sa Tarragona karong adlawng lunes, Nov. 29. (NW)