8 suspek sa Illegal nga Online Sabong sa Sta. Maria, nadakpan

Sikop sa kapulisan ang walo ka mga indibidwal human nga nasakpang nagpahigayon og illegal nga online sabong sa Barangay Basiawan, Sta. Maria, Davao Occidental, pasado 7:00 ang takna sa gabii, Miyerkules (Pebrero 16).

Subay sa report gikan sa Sta. Maria Municipal Police Station nga maoy mipahigayon sa operasyon kauban ang mga operatiba gikan Criminal Investigation and Detection Group of Davao Occidental Provincial Field Unit naabtan sa mga otoridad ang walo ka mga indibidwal nga nagsugal pinaagi sa online sabong sa usa ka bilyaran sa nasangpit nga lugar. 

Giila ang mga dinakpan nga sila Jupiter Mangubat, hamtung ang panuigon; Jonathan Ormo, Dan Romulo Bandiala, Reynald Pausal, Arvin Pongase, Marlon Tejada, Jonard  Dumape, ug si Ronnie Soco pulos residente sa susamang dapit.

Nahipos sa otoridad ang mga ebedensiya nga gilangkuban sa usa ka 40-inch Flat TV, remote control ug kwarta nga mobalor sa P3,200.00 nga gitouhang pusta.

Ang mga dinakpan mag-atubang og kasong paglapas sa anti-illegal gambling law ubos sa Presidential Decree 1602 ug Republic Act 9287. ( report gikan sa Sta Maria Police Station)