8 anyos nga anak ni Gov. Uy sa De Oro, nanguna sa pediatric vaccination roll-out

Nagboluntaryo matud pa ang 8 anyos nga anak ni Davao de Oro Gov. Jayvee Tyron Uy nga magpabakuna kontra Covid-19. 

“Nag-volunteer gyud si Althor (anak), ug ako isip ginikinan misuporta gyud ko. Na-inform na kita sa epekto  sa bakuna  sa atong  mga bata ug makaayo ni para sa ilaha ug sa komunidad,” asoy ni Gov. Uy. 

Lakip sa ihap ang anak ni Gov. Tyron nga si Althor John Uy sa 53 ka mga kabataan nga bulontaryong nagpabakuna sa Valentine’s Day “Kick-off Ceremony of the Vaccination Roll-out” sa pediatric population nga dunay edad 5-11 anyos. 

Gipahitabo ang maong kick-off ceremony atol sa Valentines Day, diin kauban ni Althor John ang iyang mga ginikanan nga sila PWDC Chair Madam Sholai ug Gov. Tyron Uy sa iyang pagdawat sa unang dose sa Covid-19 vaccine sulod sa  Zubiri Gym, Capitol Complex. 

Busa giawhag ni Gov. Uy ang mga ginikanan nga ayuhon pagpagsabot ngadto sa ilang mga kabataan ang kaayuhan sa pagpabakuna kontra covid-19. 

“Dili kita mag lisod og awhag sa mga kabataan basta maayo lang ang pagpasabot nato sa ilaha. Atong i-awhag ang mga ginikanan nga adunay bata edad 5 to 11 years old, ipabakuna na nato sa mga vaccination centers  sa matag munisipyo. Daghan ta og supply, ug ma-priority nato ang mga kabataan karon.” sulti ni Gov. Tyron Uy.