7 ka kaso sa Omicron variant nakasulod sa Mati City

Gikumpirma sa Department of Health XI (DOH-11) base sa resultang gipagula gikan sa mga swab samples nga gisumetir sa Mati kaniadtong bulan sa Enero 2022 nga aduna nay nakasulod nga kaso sa Omicron variant sa Covid-19 sa syudad.

Nasayran nga naggikan sa unom sa pito ka kumpirmadong kaso sa Omicron gikan sa usa ka pamilyang dunay bisita gikan sa Manila ug Cebu niadtong bulan sa Disyembre.

Diin ang mga miyembro sa pamilya niini dunay 12 ka close contacts og tanan nagpositibo sa Covid-19. Samtang ang ikapitong kaso gikan sa usa ka returning OFW nga miabot sa Davao airport niadtong Disyembre 24, 2021.

Apan wala kini close contact nga taga Mati gumikan dali kining naquarantine sa Davao City pag-abot niini sa Davao airport. Hinoon, ang pito ka pasyente dugay ng naka-recover gikan sa Covid-19 niadtong bulan sa Enero.

Una pa man ang kumpirmasyon sa pagsulod sa Omicron variant sa Dakbayan sa Mati, ang Mati Incident Management Team dugay nang nangandam sa pag-abot niini pinaagi sa striktong pagpatuman sa mga health guidelines aron mapakgang ang pagtakod-takod sa komunidad.

Usa sa mga pamaagi mao ang pagpatuman sa granular lockdown sa mga lugar nga dunay pagtakod-takod sa mga miyembro sa pamilya.

 Agresibo usab ang pagpamakuna sa Mati IMT ngadto sa katawhan hilabi na ngadto sa mga lugar nga dunay taas nga risgo.

Tungod niini, ang pagsaka sa kaso sugod bulan sa Enero dili sama ka paspas sa panahon sa Delta surge niadtong bulan sa Agosto ug Setyembre 2021 diin dunay sumatotal 1,495 ka Matinians ang nataptan sa virus sulod lamang sa duha ka bulan.

Sa bulan sa Enero 2022, miabot lamang sa 694 ka Matinians ang kumpirmadong nataptan sa sakit.

Bisan pa man tuod wala pa nahuman ang pagsaka sa mga kaso tungod sa Omicron variant, dako ang pagsalig sa mga otoridad nga mubaba na kini karong bulan sa Pebrero.

Busa, nagpahimangno ang Mati IMT sa publiko nga magpabiling igmat ug mabinantayon batok Covid-19.

Gi-awhag ang katawhan sa Mati nga striktong musunod sa minimum public health standards aron malikayan ang pagsaka sa kaso.

Bisan pa man og dili sama ka delikado sa Delta variant, ang Omicron paspas nga makatakod ug mamahimo lamang gihapon kining makapatay hilabi na ngadto sa mga dunay sakit na daan o di kaha wala pa mabakunahi. Busa dugang awhag niini sa publiko nga magpabakuna na batok Covid-19.