60,000 ka pamilya sa Mati City makadawat og pinaskuhan

Mukabat sa 60,000 ka pamilya sa Mati City ang gikatakdang makadawat og Christmas food packs gikan sa lokal nga panggamhanan.  

Ang mga food packs gilangkuban sa lima ka kilong bugas og Mati’s Choice na manok. Karung adlawa, (Disyembre 6) ang mga residente sa Magsaysay, Barangay Central ang unang nakadawat sa Christmas food packs ug isunod ugmang adlawa (Disyembre 7) ang mga residente sa Magapo, Sudlon, ug Central Elementary School.

Mukabat sa 14,980 ka mga pamilya nga taga Barangay Central ang makadawat sa maong pinaskuhan.

Gipangunahan ni Mati City Mayor Michelle Nakpil Rabat ang pagpanghatag sa Christmas food packs kauban sila Congresswoman Corazon Nuñez Malanyaon, Vice-Governor Niño Uy, Board Member Louie Rabat, Councilors Eric Rabat, Edwin Barrera, Xander Paul Ancantara, Dodo Miones, Samuel Rodriguez, Stephen Paul Uy, ug former councilors Noli Balugo, ug Jerome Dayanghirangang.

Libuton sa mga personahe sa lokal nga panggamhanan sa Mati ang 26 ka mga barangay sa syudad hangtud Disyembre 17, ang target nga mahuman ang pagpanghatag sa Christmas foodpacks.

Sa Disyembre 8, gikatakdang mahatagan ang 581 ka pamilya sa Barangay Culian, 482 ka pamilya sa Barangay Sanghay, 804 ka pamilya usab sa Barangay Libudon ug 260 ka pamilya ang mahatagan sa Barangay Danao diin ipahigayon sa ilang nagkadaiyang Barangay covered courts ang maong distribusyon.

Samtang, sa Disyembre 9, ang 6,741 ka mga pamilya sa Barangay Macambol, Mamali, Dawan, ug Badas na usab ang makadawat sa maong Christmas food packs.

Laing 5,517 usab ka pamilya mahatagan sa Barangay Lawigan, Tam-isan, Bobon, ug DMM

Sa Disyembre 10 hangtud Disyembre 17, 2021 nahatagan ang mga mosunod nga mga barangays: Tagabakid 618 ka pamilya, Mayo (1,373), Del (1,425), DSL (1,632), Tagbinonga (517), Taguibo (926), Buso (791), Sainz (4,008), Matiao (5,570), Dahican (7,610), Lanca (395), Luban (423), Cabuaya (717), ug Tagbobolo (400).

Bisan paman og panahon karon sa eleksyon gihangyo ni Mayor Rabat ang katawhan nga dili sagulan og politika ang pagpanghatag nila og Christmas food packs sa katawhan tungod kay tanang Matinians makadawat gayud sa regalo gikan sa lokal panggamhanan.

Dakong kalipay ug pasalamat usab ang gipaabot sa mga Matinians nga nakadawat na sa maong pinaskuhan. (NW)