11 PTV ug 12 ambulance gihatag ngadto sa mga barangay sa Davao City

Gipangunahan  ni  Davao City 1st District Representative Paolo “Pulong” Duterte ang blessing ug turn-over sa 11  a Patient Transport Vehicles (PTV)  ug 12 ka  mga Ambulance Trikes  nga gipahigayon sa Jesus Soriano National High School, Catalunan Grande niadtong  Miyerkules, December  8, 2021.

Dise sais ka barangay ug usa ka disaster team sa Davao City ang nakadawat sa bag-ong PTV ug ambulance trikes nga gidonar gikan sa ACT-CIS Partylist ug Goldenville Corporation pinaagi sa opisina ni Congressman Paolo Duterte ubos sa programa sa PPP (Pulong-pulong ni Pulong).

Ang mga barangay nga nakabenepisyo mao ang ; Brgy. 76-A, Talomo Proper, Matina Aplaya, Matina Pangi, Baliok, Bago Gallera, Magtuod, Maa, Brgy. 2-A, Brgy 14-B, Brgy. 22-C, Brgy. 23-C, Brgy. 5-A, Brgy. 21-C, Dumoy, Catalunan Pequeño ug usa ka Disaster Asistance Response Team.

Atol sa blessing ug turn-over gipasibaw sa kongresista ang tumong sa maong programa mao ang paghatag og dinalian nga pagtubag sa mga programa ug serbisyo sa panglawas sa mga barangay, ilabi na sa lagyong mga komunidad sa Unang Distrito.

“Pasalamat ko nila nihatag sila. Kanang mga suot-suot na mga lugar labi na Talomo, 76-A, Matina Pangi, at least dali magawas ang pasyente dira. Kita naman ta sa atong mga barangay dili kasulod mga ambulance sa kagamay sa dalan,” tipik sa pamahayag ni Cong . Duterte atol sa iyang pakighinabi sa mga grupo sa media.

Gibutyag usab sa magbabalaud nga laraw niining mahatagan ang tibuok 54 ka mga barangay sa iyang distrito ug dugang pa niya nga kauban ang iyang mga kaubanan sa buhat maningkamot sila nga makumpleto ang nasangpit proyekto.  (NW_KMT)