100 housing units tukoron sa NHA alang sa Tribong Dibabawun sa DavNor

Pormal na nga gipahigayon ang ground breaking alang sa pagtulod sa 100 Indigenous Peoples (IP)housing units sa tribong Dibabawon sa Barangay Sto. Niño New Corella Davao del Norte niadtong Miyerkules (Pebrero 9).

Personal nga gitambungan ni Davao del Norte Governor Edwin Jubahib, NHA Regional Manager Engr. Clemente Dayot, NHA Dist 1 OIC Atty. Alper John Alcaraz, mga opisyal sa Barangay, National Commission on Indigenous Peoples (NCIP)ug Department of Human Settlements and Urban Development (DHSUD).

Tungod sa pakig-alayon sa provincial government ngadto sa National Housing Authority ug ubang nasyonal nga mga ahensya, napondohan ang nasangpit nga “pabahay” alang sa mga IPs sa Davao del Norte.

Ang proyektong “BALAI KABAUYAN TU DIBABAWON” usa sa pabahay program ni Pangulong Rodrigo R. Duterte alang sa mga IPs pinaagi sa NHA nga gipondohan og P20-million.

“Huwag na kayong padala sa mga NPA, dito tayo sa tunay na pagbabago at may tunay na malasakit na gobyerno,” tipik sa mensahe ni Engr. Clemente Dayot alang sa mga benepisyaryo sa programa.

Sama sa ubang IP community nga natukoran na og pabahay, dili lang kutob sa pabalay ang paningkamot sa administrasyon ni Gobernador Jubahib.

Dunay mga trainings nga ginapahigayon aron ang mga IPs makabarog sa ilang paningkamot sama sa “banana chips making” sa tribong Dibabawon.

“Dili lang taman sa panimalay. After ani maghimo ta’g livelihood program; gi-training namo naa na’y livelihood ninyo kadtong banana chips; kinahanglan inyo ning suportahan, then mananom mo para duna mo’y pirmeng income ug ato pod isuporta ang KAAGAPAY program para sa inyong sustainable livelihood program,” mensahe sa gobernador.

Dugang ni gobernador Jubahib, nga sa probinsya sa Davao del Norte aduna nay 600 houses ang gitukod alang sa mga IPs.

Sa Talaingod naa nay 300 houses; 100 houses sa Kapalong, 100 houses sa Asuncion ug ika-600 houses ang sa New Corella.

“Ang atong gobyerno karon naka-focus para paghatag og tabang or intervention para suporta sa atong mga kaigsoonang IP nga atong nakita nga lisod kaayo ang ilahang panimalay. Ug sayod ta nga sila mismo maglisod pagpatukod sama niining desenteng panimalay. . Mao ni ang atong paningkamot nga ang taga-Davao del Norte walay mapasagdan, no one left behind,” dugang sulti ni Jubahib.